Les primeres muestres prehistóriques d´esti conceyu son de la Edá del Bronce como son los túmulos megalíticos de Callacente y La Baúga y los hachos alcontraos de Villoria y Tiraña. D´época castreña tenemos lixeres pistes como´l castru´l Cercu, El Prau Castiello y La Corona en Boroñes. Estos castros son atribuíos a la Edá del Fierro, pero nun tienen una datación fixa pola falta d´escavación.

De periodu romanu hai poques noticies de fiar pues anque se sitúen estructures arquiteutóniques como´l puente Villoria o´l torreón del Condao, amás d´esplotaciones mineres, los estudios más recientes sitúen namái nesta zona una ruta romana que cruziaría´l valle´l Nalón pa traviesar el puertu Tarna.

De periodu medieval hai poques noticies tamién, pues dalgunes considerense poco de fiar. Lo que sí ta claro ye la esistencia d´una demarcación col nome de Flaviana, cuyos representantes acuden al conciliu ovetense del añu 1115. Nesta época un monasteriu que taba acaparando gran importancia yera´l de San Vicente d´Uviéu. Nestes feches esta demarcación ya cuntaba con un cargu ascritu al so gobiernu, teniendo gran importancia comarcal y rexonal debío a la ruta que cruziaba tou´l valle´l Nalón.

Foi nel sieglu XIV, cuando la zona tien un cambéu na so ordenación territorial y urbanística, asina toes estes zones vense dotaes d´un centru alministrativu. La puebla que xerarquizaba´l territoriu de Llaviana ye de 1344. Datase la fundación d´esti villazgo a finales del sieglu XIII. Como llugar de tránsitu, La Pola Llaviana nun algamó gran desarrollu demográficu, pero la so composición social sí marca diferencia col so entornu agrariu, asina suponse la presencia nesta puebla de notariu, ferreru, carpinteru, etc. Aparte del dominiu patrimonial exercíu pol monasteriu de San Vicente, tamién hai un influxu creciente de les families señoriales.

Nel sieglu XIV, la situación del conceyu de Llaviana continuaba con cotos qu´escapaben de la xurisdicción, los cotos de San Vicente y Villoria, que mantendríen una estructura rural y ganadera teniendo que pagar diezmu a los sos señores y vivir baxo la so xurisdicción marcada pol despotismu. Cola desamortización de Felipe II, ye cuando dalgunos cotos son redimíos pol pueblu, como´l coto d´Entiralgo, incorporándose al conceyu de Llaviana, nun consiguiendo otros cotos salir de les manos de los sos señores, como´l coto de Tiraña.