Ascensión al picu Guanalón (I)

Aniciamos l´andaura nel pueblu de Soto Llorío. Al traviesar esti llugar garramos un camín, anterior a dos hórros siguios, que sal pola drecha, anchu y de bon firme, discurre con direición Sur, pola drecha del estiráu valle de Soto, ganando altura suavemente. Alcuentranse diverses ramificaciones, dalgunes d´importancia, pero´l camín principal ye mui evidente. Asina algamamos en pocu tiempu, con un desvíu que según reza un cartelo, sube pola drecha al Cantu la Fuente. Mas tarde llegamos a otra bifurcación, onde hai una cabana, mesa y bancos y la fuente la Campa Fondera (560 m), llugar de descansu y nel que dexamos un camín a la drecha.

Continuamos la marcha al frente, desentendiéndonos primero d´una desviación a la drecha y lluéu otra que baxa pola izquierda (565 m) a cruziar el ríu, col fin de comunicar les cabanes de Les Pericuetes y Campu Tiñosu. La siguiente bifurcación qu´alcontramos, al pasar xunto a una finca, dirixese pola izquierda, en llano, al Candanu, mientras que pola drecha, n´ascensu, conduz a Les Edraes (600 m).

Nosotros garraremos el desvíu de la drecha y en pocu tiempu pasamos pola zona de descansu de Les Edraes (640 m), que tien una fuente, mesa y bancos. Lluéu dexamos dos caminos escalonaos pola drecha (680 - 685 m), pa llegar a continuación a les camperes onde muerre´l camín (685 m). Remontando al SurOeste pola cuesta herbosa, enlazamos con un camín altu que nos conduz a la Collá´l Navalín (778 m), encrucixada de caminos onde hai una cabana y una fuente seca, que da vista pol oriente al valle de la Fombermeya.