Una vuelta por Peña Mayor (I)La Sierra de Peña Mayor ye una llamativa montaña que s´eleva con una fuerte identidá nel centru xeográficu de la rexón.
La sierra estiéndese de Norte a Sur,
sobre un espaciu xeográficu con una longitud aprosimada de 7,5 kilómetros cuadráos ente´l colláu Orosu
y les estribaciones meridionales del espinazu final qu´apunten al Condáu (o El Condao), en Llaviana.
Les escabroses laderes, densamente surcaes por profundes vallines, emerxen bruscamente sobre plácides tierres d´un tarrén de serena belleza,
salpicáu de rústiques y fecundes mayáes pastoriles. Taben domináes poles siluetes de les cumales más
emblemátiques: Trigueru (1.293 m), techu la sierra, Texu (1.254 m), los Ortigales (1.091 m) y el renomáu Fueyu (1.149 m),conocíu popularmente
como Peña Mayor.
La ruta parte del valle de Tiraña, pola carretera AS-251 que sube al finxu del conceyu a La Faya los Llobos (659 m), aldea
situada nuna vaguada ente La Ferrerina y El Rasu.
De la mesma carretera (col panel indicativu), sal una pista (P.R. AS - 54), que va bordeando´l picu El Rasu, fasta
confluir, nel Violar, una campera pequena y dalgunes cuadres, cola pista aformigonada que vien de La Casilla (P.R AS - 139),
en direición Este, y ensin apenes perder altura va dando vista a los conceyos de Bimenes, o Llaviana, pasando pola campa L´Arquera, Tres Picos,
Picu la Úa y Campafelguera.
Más palantre y na más pasar La Felguera, descendemos suavemente pola falda Norte de la sierra y pronto llocalizaremos el manantial de
Fuentefría, prósimu a la Campa la Vaúga (809 m) onde la pista que llevamos entróncarase cola que sube de l´aldea La Gamonal.
Sobre´l grupu de buenes cases que componen La Vaúga, perfilase´l murallón de Peña Mayor sustentáu con un tobogán d´espolones calizos.
La ruta sigue de frente fasta´l cordal pol mediu d´una empinada pista que rodea´l área recreativa Xerrugües, fasta desembocar
en Campagües xusto detrás del mirador de Xerrugües, una amplia campera por debaxo la cual alcuéntrase un chigre y el Refuxiu de Xosé Mata.
|