ARMANDO PALACIO VALDÉS

(1853 - 1938)
Nació n´Entrialgo, anque, por mor de la familia y el trabayu, pasó la vida ente Avilés, Uviéu y, sobremanera, Madrí. Estudió p´abogáu, pero nun exerció, y dende bien mozu dedicóse a la lliteratura. Espublizó más de venti noveles, dalgunes d´elles consideraes obres maestres -El cuarto poder, La fe o La espuma, por exemplu- y otres algamaron la reconocencia del públicu llector, como José o La hermana San Sulpicio. De munches de los sos rellatos fexéronse películes y foi ún de los novelistas cimeros de la so dómina, recibiendo enforma d´ homenaxes. Foi Académicu de la Llingua y, per dos vegaes, candidatu al Premiu Nobel. Cuatru de les sos noveles -El señorito Octavio, El idilio de un enfermo, La aldea perdida y Sinfonía pastoral- tienen d´escenariu y ambiente al conceyu Llaviana, al que tuvo xuníu de cuerpu y alma a lo llargo de tola vida. Dende 2003, na so casa de nacencia, n´Entralgu, ta en funcionamientu´l Centru d´Interpretación Palacio Valdés col envís d´esparder la so vida y obra